Professor Douel juda isteʼdodli olim edi. Uning tibbiyot rivoji yo‘lidagi ixtirolarini taʼriflashga so‘z ojiz. U shu qadar ilm-fan tubiga sho‘ng‘igan ediki, hatto butun vujudini unutayozgan, faqat miyasigina uning mavjud ekanini anglatib turardi. Ammo bir kuni ko‘zlarini ochdiyu, boshi ostida vujudini emas, oddiygina stolning sovuqqina to‘rt oyog‘ini ko‘rdi .... Ha, professor insoniyatni o‘limdan saqlab qolish, hech bo‘lmaganda, miyasini qayta jonlantirish ustida izlanayotgandi, ammo ilk tajriba quyonchasi o‘z boshi bo‘lishini xayoliga ham keltirmagandi. Jahon adabiyotining zabardast fantast yozuvchisi Aleksandr Belyayevdan yana bir asar - "Professor Douelning boshi"ni kitobxonlarga havola qilar ekanmiz, o‘quvchini mulohazaga chorlaymiz. Mutolaa davomida yozuvchining insoniyatni og‘ir vaziyatlarda tirik qolish imkoniyatlarini axtarish, ilm-fanda misli ko‘rilmagan yangiliklarga qo‘l urishga chaqirgani behuda emasligini, insoniy fazilatlar kishi muvaffaqiyati yoxud tanazzulida naqadar muhim rol o‘ynashini anglaymiz.